شاركت الفنانة رانيا فريد شوقي جمهورها، عبر حسابها الشخصي على موقع التواصل الاجتماعي "فيسبوك"، بمنشور كشفت من خلاله سرًا عن النجم الراحل فاروق الفيشاوي، أثناء فترة تحضير مسرحية "الملك لير". وقالت "رانيا": "فاروق الفيشاوي أعلن في مهرجان إسكندرية إنه مريض بالسرطان، وقال أنا هتعامل على إنه صداع، وحقيقي ده اللي حصل، كنا بنعمل بروفات مسرحية الملك لير، عمره ما جه مكشر أو حزين، بالعكس دايما بيضحك ويهزر مع كل الناس، من الصغير للكبير". وأضافت: "كان دايما يقولي يا بنت الملك ويقعد يحكي لي حكايات هو وبابا ولأنه إنسان أوي، هو عارف إن سيرة أبويا بتسعدني فبيتعمد يحكي عشان يسعد قلبي وهو كمان من حبه لبابا بيبقي سعيد إنه بيتكلم عنه، ويترحم عليه. وحكت "رانيا" موقفًا من كواليس المسرحية قائلة: "مرة قالي تعالي أوريكي أنا عامل إيه في أوضتي في المسرح لقيته معلق صورة أبويا وفنانين من الزمن الجميل، وابتدينا عرض المسرحية والله العظيم عمره ما حسسنا إنه مريض أو تعبان، بالعكس كان دايما بيهزر ويضحك ويستمتع بالتمثيل لدرجة إننا نسينا إنه مريض". وتابعت: "حتى لما اعتذر عن السفر مع المسرحية للسعودية ما قالش إنه تعبان ولما رجعنا من السفر عرفنا إنه دخل المستشفى في حاله حرجة، كنا هنتجنن عايزين نطمن عليه، لكن للأسف ممنوع الزيارة وعرفنا الخبر المؤلم، كان نفسي أشوفه". واستطردت: "عارف يا روقا أنا اتعلمت منك القوة وحب الحياة وإن مع المرض مش لازم أكون ضعيف وأفضل أعافر وأقف على رجلي لآخر لحظة استمتع بالحاجة اللي بحبها وهي التمثيل وأشوف حب الناس ليا، تصقيفهم الحار ليك كل يوم، أكيد ده كان بيسعدك وأنا شفت ده في ضحكتك وعيونك اللي كانت بتدمع أثناء التحية". واختتمت: "كنت راضي باللي ربنا كتبهولك يا تعيش يا تموت وأنت اختارت تعيش وتتبسط وتبسط اللي حواليك لآخر لحظة، ضحكتك مابتفارقنيش، الله يرحمك ويجعل مثواك الجنة ويجعل صبرك ورضاك وجدعنتك والخير اللي كنت بتعمله، وكل إنسان أنت أسعدته وجبرت بخاطره في ميزان حسناتك.. هتوحشنا أوي". يشار إلى أن مسرحية "الملك لير" كان يشارك في بطولتها الراحل فاروق الفيشاوي، مع يحيى الفخراني، وأحمد عزمي، وناصر سيف، ورانيا فريد شوقي، وريهام عبد الغفور، وهبة مجدي، ونضال الشافعي، ومن إخراج تامر كرم. [more_vid id=" 6w3PTOrddPmrSi1DxVrA" title="مسرحية الملك لير" autoplay="1"]