روى الفنان أحمد سلامة كواليس موقف محرج تعرض له خلال تصوير فيلم "المولد" مع النجم عادل إمام في قبرص.
وقال أحمد سلامة خلال لقاء تلفزيوني: "عادل إمام شخصية في غاية الجدعنة اللي في الدنيا، كنا بنصور فيلم المولد في قبرص ونازلين في الشيراتون، وأنا عايش حياتي في الطلبات وفاكر إن كله معزوم".
وأضاف أحمد سلامة: "نزلت أدفع الحساب علشان نرجع مصر، لقيت فاتورة بحوالي 3 آلاف جنيه قبرصي، وكان أيامها بـ 6 جنيه مصري ورقم، والممثل لو صابح مسافر بيشتري هدايا بالعملة وكان مش معايا ولا مليم، وابتديت أبص في الأوتيل أشوف همسح وأنضف إيه".
وتابع: "اتصلت بأستاذ عادل وقلت له على المشكلة، فقال خد شنطتك واستناني، ونزل أخدني وركبنا الباص وسافرنا ومعرفش حصل إيه، لكن الفاتورة اتدفعت".
أوضح أحمد سلامة أنه حاول رد قيمة الفاتورة إلى عادل إمام قائلا: "حبيت في مناسبة أرجع له الفلوس، فقاللي يا أحمد إنت فاكر أنا اللي دفعت؟ أنا بقول للإنتاج يدفع، بس إنت جدع، وربطتني به صداقة استمرت فترة وأنا أعشق هذا الرجل".
يذكر أن أحمد سلامة عرض له في شهر رمضان الماضي مسلسل "سر إلهي"، وشارك في بطولته إلى النجمة روجينا كل من أحمد مجدى، رنا رئيس، مى سليم، محمد ثروت، نهى عابدين، محمود الحدينى، صلاح عبد الله، وأحمد بدير، وميمي جمال، وأحمد سلامة، ومحسن منصور، و مي سليم، و رشا مهدي، ومراد مكرم، ومحمود حجازي، ومريم أشرف زكي، يوسف الأسدي.
