لا شك أن البنات هن "ألطف الكائنات" بحسب وصف السندريلا "سعاد حسني"، ويتمتعن بصفات مميزة، وفي كل شلة أو صحبة بنات، تصادف فتاة لها صفات تميزها عن غيرها. في هذا المقال، نعرفكم على 5 أنواع من البنات تجدونهم في كل شلة. البنت اللي شايفة نفسها كل يوم بتظهر في "لوك" جديد، مرة عاملة شعرها كيرلي ولابسة كعب طويل، مرة تانية هتلاقيها جايه الشغل full makeup، دايماً النوع ده من البنات هتكون بتغير صورة البروفايل بتاعتها على فايسبوك كل ساعتين تقريبا!   البنت العملية دي بقى، معندهاش وقت تضيعه لو خارجين سوا يمكن تلاقيها جهزت قبلك بساعة إلا ربع، غالباً ستايل لبسها مفيهوش عقد كتير، يا دوب بنطلون وتيشرت على كوتشي أبيض، ومتسألنيش ليه أبيض! آه، نسيت أقولكم، إن البنت دي في بيتها منظمة جداً، يعني يا ويلك لو لعبت في ترتيب النيش بتاعها، أو لو فكرت مثلاً مجرد تفكير أنك تغير ديكورات الشقة، احتمال تبات اليوم ده عند مامتك إنما هي أكيد مش هتخرج من الشقه عارف ليه؟لأن الشقة من حق الزوجة طبعاً.   البنت المثقفة اللي لازم في كل قعدة مع عيلتك تلاقيها بتقول رأيها في قضايا الساعة، هتحلل أزمة الصراع في الشرق الأوسط وهتتكلم مع أختك عن آخر مؤلفات محمد حسنين هيكل، ومش بعيد وانتم قاعدين على الغدا تمسك الريموت وتجيب قناة الأخبار، لو قولتلها أيه رأيك نتفرج على فيلم السهرة، هتبصلك من فوق لتحت و برضه هتشغل الأخبار، النوع ده من البنات نادر جدا، وغالباً مش هتلاقي بسهولة. البنت الأم طبعاً دي مش محتاجة شرح، هي مجرد متبص في وشك هتقولك مالك؟ مين مزعلك! طب أحكي، مش أنا زي ماما. النوع ده بالذات هتحس معاه بالحنيه والاحتواء، في شلة الصحاب هي كاتم أسرار كل الكابلز، وفي العيلة هي الكبيرة حتى لو كان سنها 25 سنة، حتى كلامها كله دعوات أن ربنا يفتحها في وشك و يوقفلك ولاد الحلال.   البنت الطفلة طبعا دي كلكم عارفينها، أيوه هي "سعاد حسني" في "صغيرة على الحب"، بتحب أوي تتكلم زي الأطفال، دايماً تقول "مش أعرف"، أنا شخصياً معرفش مين ده! النوع ده من البنات بتعيط من أقل حاجة، يعني لو قولتلها، مالك؟ هتعيط، شكلك تعبان ليه؟ هتعيط، لون شعرك اللي فات كان أحلى، برضه هتعيط. دايماً النوع ده من البنات مرهف المشاعر والأحاسيس، ولو فكرت أنك تتجوز من النوع ده. ورغم كل الأنواع التي ذكرناها، لكن يوجد أنواع أخرى لم تذكر، مثل "البنت المنفسنة" و"البنت المسترجلة" و"البنت المغلوبة على أمرها". هل هناك أنواعاً أخرى نسينا ذكرها؟ سعاد حسني "سندريلا الشاشة" [vod_video id="9uoKSUYHKCq9ztS4WMsXw" autoplay="1"]